Það er stutt í grimmdina

Á morgun, þann 1. febrúar, fer ný íslensk kvikmynd í sýningu, Tryggð eftir Ásthildi Kjartansdóttur.  Kvikmyndin er byggð á skáldsögunni Tryggðarpantur eftir Auði Jónsdóttur sem var gefin út árið 2006. Leikkonan Elma Lísa Gunnarsdóttir fer með aðalhlutverk í myndinni og segir í samtali við íslenska Glamour þetta vera hennar stærsta hlutverk til þessa.

Elma Lísa er Íslendingum vel kunn leikkona, bæði á sviði leikhúsanna og í íslenskum kvikmyndum. Í kvikmyndinni Tryggð leikur Elma Lísa Gísellu. Kvikmyndin var mikil áskorun og er Elma nánast í hverri einustu senu. Elma Lísa tók stóran þátt í gerð myndarinnar frá upphafi.

„Ásthildur leikstýra hringdi í mig fyrir um fjórum árum síðan. Þá var hún nýbúin að fá réttinn á bókinni frá Auði Jónsdóttur. Svo hittumst við og Ásthildur býður mér hlutverkið, við fáum okkur rauðvínsglas saman og förum að spjalla um þessa sögu, þessa bók. Ég hafði lesið bókina og satt að segja hafði persónan Gísella í bókinni pirrað mig svolítið,“ segir Elma Lísa og bætir við að langt ferlið hafi bæði verið gaman og gefandi. „Við mótuðum myndina svolítið saman.“

Myndir/Ernir Eyjólfsson

Það má segja að sagan snúist mikið um samskipti og einhverskonar valdabaráttu. „Myndin fjallar um Gísellu, sem stendur á ákveðnum tímamótum. Hún missir vinnuna, er blönk og þarf í rauninni í fyrsta skipti að standa á eigin fótum. Hún er smá forréttindapía sem erfði risastórt hús eftir ömmu sína og hefur ekki mikið þurft að pæla í peningum,“ segir Elma Lísa. „Gísella fær vinnu við að skrifa um húsnæðismál útlendinga og þá kynnist hún þessum tveimur konum, skoðar húsnæðið þeirra og í framhaldinu býður hún þeim að koma og búa í húsinu sínu. Önnur þeirra á litla stelpu sem Gísella tengist sterkum böndum. Gísella býr ein í þessu risastóra húsi og er frekar einmanna.“ 

Gísellu finnst hún vera að gera góðverk með þessu og það gengur allt mjög vel til að byrja með. Samkvæmt Elmu Lísu er Gísella frekar stjórnsöm týpa, svo lengi sem þær gera það sem hún vill, þá gengur sambúðin vel. „En svo fer að halla undan fæti, því þær eru auðvitað með ólík gildi og ólíkan smekk. Þá fara að koma ákveðnir brestir í þessa sambúð, Gísella fer alltaf að búa til fleiri og fleiri húsreglur.“ Elma Lísa bætir svo við að Gísella verði einhverskonar fangi í sínu eigin húsi og að hún hafi komið sér í það sjálf. Gísella er hvorki sveigjanleg né víðsýn og býst hún við því að konurnar tvær geri það sem hún segir. „Maður kynnist auðvitað aldrei neinum betur en þegar maður fer að búa með honum.“ 

Mynd/Lilja Jónsdóttir

Ásthildur fékk fullt frelsi og leyfi frá Auði Jónsdóttur til að móta persónur myndarinnar og þá sérstaklega hana Gísellu. „Það var svolítil áskorun í upphafi að finna mennskuna í henni. Við bættum til dæmis inn í að hún hafi átt barn sem hún missti. Það er ekki mikill fókus í myndinni en það var svona meira fyrir mig sem leikkonu að vita það. Þegar maður er leikari þá verður maður að finna sína leið og tengjast karakternum. En myndin er bara ein birtingarmynd af bókinni.“

Þær sem leika aðalhlutverk á móti Elmu Lísu í myndinni, þær Enid Mbabazi og Raffaella Brizuela Sigurðardóttir höfðu aldrei leikið áður. Þrátt fyrir það hafi tökur myndarinnar gengið mjög vel og segir Elma leikhópinn æft vel fyrir hverja töku.  „Við vorum rosalega dugleg að æfa. Þetta var aðeins öðruvísi að því leyti að við töluðum ensku og svo voru tvær leikkonur myndarinnar alveg óreyndar, en þær stóðu sig ótrúlega vel.“

Elma Lísa segir gerð myndarinnar hafa opnað augu sín fyrir fordómum gegn innflytjendum og finnst myndin koma á góðum tíma. „Þessi umræða er ótrúlega þörf og Auður er svolítið á undan sínum tíma með þessari bók sem hún skrifar árið 2006.“

Elma Lísa vonar að myndin fái fólk til að hugsa og setji sig í spor annarra. „Hvernig myndi okkur líða í öðru landi og þurfa að gera það sem þær þurfa að gera? Búa í öðru landi, hjá einhverjum öðrum og á forsendum þeirra sem eiga húsnæðið.“ En svo má líka rífast um myndina og segir Elma að Ásthildur leikstýra búist við að fólk geri einmitt það. 

„En lítum okkur nær, skoðum okkur sjálf og stöldrum við. Hættum að dæma,“ segir Elma Lísa þegar hún er spurð að því hvaða boðskap hún vill helst að fólk taki frá myndinni. „Það er einhverskonar grimmd í myndinni, líka væntumþykja, en þetta er oft tengt. Það er oft stutt í grimmdina hjá fólki.“

Mynd/Lilja Jónsdóttir

Efsta myndin í fréttinni er tekin af Ásgrími Guðbjartsssyni.
Fyrsta myndin af Elmu Lísu er tekin af Erni Eyjólfssyni.

Engin ummæli enn

Segðu hvað þér finnst

Netfangið þitt verður ekki birt.