Gerðu góð kaup á útsölum

Nú eru útsölur verslana að byrja og oft er hægt að gera góð kaup á flíkum sumarsins. En það er mikilvægt að vanda valið því leiðinlegt er að falla í þá gryfju að gera mjög léleg kaup þó að verðmiðinn sé góður fyrir budduna.

Glamour tók saman nokkur góð ráð sem þú getur haft í huga á útsölunum til að gera sem best kaup. 

  1. Ekki kaupa flíkina einungis vegna þess að hún er á útsölu. Ef þú fellur ekki fyrir henni, láttu hana þá vera. 
  2. Ef flíkin sem þú ert að hugsa um passar ekki við neitt annað í fataskápnum þá skaltu ekki kaupa hana. Þú munt líklega aldrei nota hana. 
  3. Ef þín rétta stærð er ekki til, slepptu þessu. Ekki kaupa of litla stærð því þú ert einmitt á leiðinni í megrun. Þannig mun flíkin daga uppi í fataskápnum, enn með verðmiðanum og aldrei verða notuð. 
  4. Vertu undirbúin, ef þú ert búin að hafa auga á einhverri flík lengi þá er tækifærið núna. Farðu yfir fataskápinn, hvað vantar þig? Gott er að nýta sumarfríið í að taka góða tiltekt í fataskápnum því þá færðu betri yfirsýn. 
  5. Geturðu notað flíkina við fleira en eitt tilefni og geturðu notað hana á marga vegu? Þá eru þetta líklegast góð kaup
  6. Leitaðu frekar eftir klassískum og einföldum flíkum sem munu endast lengi, í staðinn fyrir flíkur sem eru í tísku núna. 
  7. Það eru nokkrar flíkur sem eru alltaf góð kaup. Klassísk kápa fyrir haustið, skyrtur, gallabuxur og stuttermabolir eru flíkur sem fara ekki úr tísku. Skoðaðu svo flíkur sem eru yfirleitt með hærri verðmiða, eins og leðurflíkur, því þá ertu að fá meira fyrir peninginn. 
Glamour/Getty
Prjónapeysa og gallabuxur er alltaf flott saman og báðar klassískar flíkur sem þú notar aftur og aftur.
Caroline de Maigret klæðist ljósbrúnu frá toppi til táar, en þetta eru litir sem hafa verið vinsælir síðasta ár og verða það áfram.
Emily Ratajkowski klæðist hér flottum jakka.
Falleg dragt er alltaf góð kaup eins og ritstjóri franska Vogue, Emanuelle Alt, klæðist hér.
Jeanne Damas klæðist dragtarjakka við gallabuxur og blúndubol. Allt klassískar flíkur sem þú getur notað aftur og aftur.
Engin ummæli enn

Segðu hvað þér finnst

Netfangið þitt verður ekki birt.