Grátbroslegar Pabbahelgar

Skoða myndasafn 8 myndir

Fyrstu tveir þættir Pabbahelga voru forsýndir fyrir fullum sal í Bíó Paradís á miðvikudag en þáttaröðin hefur göngu sína á Rúv á sunnudaginn.

Mikil eftirvænting var á meðal gesta í þéttsetnum aðalsal Bíó Paradísar en forsýning fyrstu tveggja þáttana var í samstarfi við kvikmyndahátíðina RIFF. Fyrstu þættirnir lofa góðu enda ljúfsár og meinfyndin lýsing á annars alvarlegu málefni sem fjölmargir þekkja, framhjáhaldi og skilnaði og öllu því sem á eftir kemur.

Nanna Kristín Magnúsdóttir er ekki aðeins handritshöfundur þáttana og einn framleiðenda heldur leikur hún jafnframt aðalhlutverkið. Segja má að hún sem handritshöfundur geri sjálfri sér sem leikkonu ekkert sérlega auðvelt fyrir en senur hennar eru nærgöngular og oft á tíðum örlítið óþægilegar.

Sagan er af íslenskum raunveruleika og ekki er dregin upp nein glansmynd af skilnaði, aðdraganda hans né eftirleik en kómískar hliðar ástandsins eru þó aldrei langt undan. Nanna sagðist í upphafskynningu vilja spegla samfélagið á einhvern hátt og velta upp spurningum, það tekst svo sannarlega og ættu ansi margir Íslendingar að geta tengt við söguna, hvort sem þeir hafi skilið, séu að fara að skilja eða þekki einhvern sem hefur skilið.

Engin ummæli enn

Segðu hvað þér finnst

Netfangið þitt verður ekki birt.